Կոտայքի մարզի Վանատուր թաղամասում են գտնվում Քարավանատան ավերակները, Հրաղդան գետից ոչ հեռո` գյուղի ծայրին։ Արդեն իսկ գյուղի անունը (Քարվանսարա) վկայում է հնում քարավանատան գոյության մասին այս բնակավայրում, որ մի կարևոր կետ էր` հին ճանապարհի վրա։ Այստեղով անցնող ճանապարհը, ճյուղավորվելով, մի կողմից ուղղվում էր դեպի Թբիլիսի, մյուս կողմից՝ դեպի Գանձակ, իսկ Սելիմի լեռնանցքով՝ դեպի Սյունիք։ Տեղում պահպանվել է քարավանատան միայն արևմտյան մասը։ Այն ներկայացնում է անձև քարերով, կրաշաղախով շարված պատ և կիսավեր սենյակներ, որոնցից մեկը պահպանել է թաղակապ ծածկի մի մասը։ Ինչպես գյուղի տարեց բնակիչներ են ասում` Քարավանատան շենքը մինչև 1927 թվականը հիմնականում կանգուն վիճակում էր գտնվում։ Այժմ շենքն ավերված է: Գյուղի բնակիչ 90-ամյա Սուրեն պապը ցավում է, որ «չկան բարերարներ կամ գոնե պետության կողմից ֆինանսավորում, որպեսզի պահվեր գոնե այն, ինչ հիմա կա»:
ԷՄԻՆ ՄԱԹԵՎՈՍՅԱՆ
Աղբյուրը՝ mynews.am
Լուսանկարը` Վարդան Թորոսյանի